October 16, 2026
1min8
શ્રી અન્નપૂર્ણા શ્રી ખોડલ માતાજીની કૃપાથી પાટીદાર સેવા સંઘ આયોજીત “શેરી ઓટલો નવરાત્રી” દિવ્ય અને ભવ્ય રીતે ઉજવવામાં આવી રહ્યો છે, એ દરમિયાન શ્રી અન્નપૂર્ણા ખોડલધામના નિર્માણની વિધિવત્ જાહેરાત કરવામાં આવી હતી
ગુજરાત Archives - Anant Post
October 14, 2026
1min19
Gandhinagar મહાનગરપાલિકાની ચૂંટણીમાં BJPની ભવ્ય જીત, કોંગ્રેસ 2nd, AAP ખાતું ખોલાવવામાં નિષ્ફળ
ગુજરાતમાં ગાંધીનગર મહાનગરપાલિકા (GMC) ના 11 વોર્ડની તમામ 44 બેઠકો માટે 11 ઓક્ટોબરે મતદાન યોજાયું હતું અને આજે સવારે 9 વાગ્યે મતગણતરી શરૂ થઈ હતી.
ગુજરાતમાં ગાંધીનગર મહાનગરપાલિકા (GMC) ના 11 વોર્ડની તમામ 44 બેઠકો માટે 11 ઓક્ટોબરે મતદાન યોજાયું હતું અને આજે સવારે 9 વાગ્યે મતગણતરી શરૂ થઈ હતી. આ 44 બેઠકો માટે કુલ 130 ઉમેદવારો મેદાનમાં હતા. મુખ્ય મુકાબલો ભારતીય જનતા પાર્ટી, કોંગ્રેસ અને આમ આદમી પાર્ટી (આપ) વચ્ચે હતો. જેમાં ભાજપે જંગી જીત મેળવી છે, જ્યારે કોંગ્રેસ બીજા ક્રમે રહી છે. એક અપક્ષ ઉમેદવારે એક બેઠક જીતી અને આમ આદમી પાર્ટી પોતાનું ખાતું ખોલાવવામાં નિષ્ફળ રહી.
ગાંધીનગર મહાનગરપાલિકાની ચૂંટણીમાં ભાજપે જંગી જીત મેળવી છે. કુલ 44 બેઠકોમાંથી ભાજપે 38, કોંગ્રેસે 5 અને એક અપક્ષ ઉમેદવારે એક બેઠક જીતી છે. બીજી તરફ આમ આદમી પાર્ટી પોતાનું ખાતું ખોલાવવામાં નિષ્ફળ રહી છે.
ગાંધીનગર ચૂંટણી પરિણામ
- ભાજપ: 38
- કોંગ્રેસ: 05
- અપક્ષ: 01
વોર્ડ નં. 2માં ભાજપની પેનલ તૂટી છે. અહીં 4માંથી 3 ઉમેદવારો જીત્યા છે ત્યાં જ 1 બેઠક અપક્ષ ઉમેદવારને ફાળે ગઈ છે..
વોર્ડ નં. 6ના પરિણામોમાં મોટું અપસેટ
ગાંધીનગરના વોર્ડ નં. 6ના પરિણામોમાં મોટું અપસેટ જોવા મળ્યું છે. કોંગ્રેસના ચારેય ઉમેદવારો વિજેતા જાહેર થયા છે. જે બાદ ભાજપે પુનઃ મતગણતરીની માંગ કરી છે.
થરામાં ભાજપનું વર્ચસ્વ
બનાસકાંઠા જિલ્લાની થરા નગરપાલિકામાં ભાજપે 24માંથી 19 બેઠકો જીતી હતી, જ્યારે કોંગ્રેસે બાકીની પાંચ બેઠકો મેળવી હતી. થરા નગરપાલિકાની ચૂંટણીના પરિણામો પણ આજે જાહેર કરવામાં આવ્યા હતા. દેવભૂમિ દ્વારકા જિલ્લાની ઓખા નગરપાલિકામાં, ભાજપે ચૂંટણી લડાયેલી 32 બેઠકોમાંથી 29 બેઠકો જીતી હતી અને કોંગ્રેસે ત્રણ બેઠકો મેળવી હતી.
ઓખામાં ચાર બેઠકો માટે ઉમેદવારો બિનહરીફ ચૂંટાયા હતા, કારણ કે તે વોર્ડમાં માત્ર ભાજપના ઉમેદવારો જ મેદાનમાં હતા. આ ચાર બેઠકો સહિત, ભાજપે નગરપાલિકાની કુલ 36 બેઠકોમાંથી 33 બેઠકો મેળવી હતી.
આ ચૂંટણી પરિણામો સાથે ભાજપે ત્રણેય શહેરી સ્થાનિક સંસ્થાઓ પર પોતાનું નિયંત્રણ જાળવી રાખ્યું છે. ત્રણેય શહેરી સંસ્થાઓ માટે મંગળવારે સવારે 9 વાગ્યે મતગણતરી શરૂ થઈ હતી.
ગુજરાતની સ્થાનિક સ્વરાજ્યની ચૂંટણીના પરિણામો રાજ્યમાં ભાજપની નોંધપાત્ર તાકાત દર્શાવે છે, કારણ કે પાર્ટીએ ગાંધીનગર જેવી મહત્વપૂર્ણ શહેરી સંસ્થામાં પોતાની બહુમતી સફળતાપૂર્વક જાળવી રાખી છે. થરા અને ઓખામાં સત્તા જાળવી રાખવાથી પાર્ટીની રાજકીય સ્થિતિ વધુ મજબૂત બની છે. રાજ્યમાં આવતા વર્ષે વિધાનસભાની ચૂંટણી યોજાવાની છે.
October 11, 2026
1min19
- ભાજપ અને કોંગ્રેસના 44-44 અને આમ આદમી પાર્ટીના 31 ઉમેદવારો મેદાને
- ગાંધીનગર મહાનગરપાલિકા ચૂંટણી 2026! 44 બેઠકો માટે મતદાન શરૂ, 2.59 લાખ મતદારો 130 ઉમેદવારોનું ભવિષ્ય નક્કી કરશે
ગાંધીનગર મહાનગરપાલિકની ચૂંટણીમાં 11 વોર્ડની કુલ 44 બેઠકો માટે આજે સવારે 7:00 વાગ્યા મતદાન શરૂ થયું છે. સાંજે સાંજે 6:00 વાગ્યા સુધી મતદાન પ્રક્રિયા ચાલશે. ગાંધીનગર મનપાની આ ચૂંટણીમાં 1,32,457 પુરુષ અને 1,27,314 મહિલા મતદારો સહિત કુલ કુલ 2,59,780 મતદારો મતદાન કરવાના છે. આ મતદારો મતદાન કરીને કુલ 130 ઉમેદવારોનું રાજકીય ભવિષ્ય નક્કી કરશે.
11 વોર્ડની કુલ 44 બેઠકો પર શાંતિપૂર્ણ રીતે મતદાન થાય તે માટે 295 બૂથ તૈયાર કરવામાં આવ્યાં છે. ખાસ કરીને વાત કરવામાં આવે તો, વોર્ડ-2માં 14, વોર્ડ-4માં 13, વોર્ડ-7માં 12, વોર્ડ-10માં 10, વોર્ડ-1માં 8, વોર્ડ-3માં 4, વોર્ડ-5માં 8, વોર્ડ-6માં 8 અને વોર્ડ-11માં 5 મથકો સહિત કુલ 90 મથકો સંવેદનશીલ પણ જાહેર કરવામાં આવ્યાં છે. આ ચૂંટણી પ્રક્રિયા સુચારૂ રૂપે પૂર્ણ થાય તે માટે 5 ચૂંટણી અધિકારી, 5 મદદનીશ ચૂંટણી અધિકારી અને 1700 પોલિંગ સ્ટાફ મતદાન મથકે તૈનાત કરવામાં આવ્યો છે. આ સાથે લોકોને પણ શાંતિપૂર્ણ રીતે મતદાન કરવામાં માટે અપીલ કરવામાં આવી છે. ઈવીએમ પ્રક્રિયા માટે તંત્ર દ્વારા 730 BU અને 364 CU મશીનોની ફાળવવામાં આવ્યાં છે.
અત્રે ઉલ્લેખનીય છે, ગાંધીનગર મહાનગરપાલિકાની આ ચૂંટણીમાં ભાજપ 44 ઉમેદવારો, કોંગ્રેસના 44 ઉમેદવારો અને આમ આદમી પાર્ટીના 31 ઉમેદવારો સહિત કુલ 130 ઉમેદવારો મેદાનમાં છે. આ ચૂંટણી માટે 2 સપ્ટેમ્બરે ડ્રાફ્ટ મતદાર યાદી અને 14 સપ્ટેમ્બરે આખરી યાદી જાહેર કરવામાં આવી હતી. આ ચૂંટણી પ્રક્રિયા શાંતિપૂર્ણ રીતે યોજાય તે માટે 1130 સુરક્ષા જવાનો તૈનાત કરવામાં આવ્યાં છે. આ દરમિયાન જિલ્લા પોલીસ વડાના સુપરવિઝનમાં 6 DySP, 15 PI, 40 PSI, 580 પોલીસ જવાનો, 350 હોમગાર્ડ અને SRPની 3 પ્લાટુન ફરજ બજાવશે તેવું જાણવા મળ્યું છે.
આ ચૂંટણી પ્રક્રિયા દરમિયાન કોઈ ગેરરીતિ કે વિવાદ ના સર્જા તે માટે જિલ્લા કક્ષાએ કંટ્રોલરૂમ પણ કાર્યરત કરવામાં આવ્યો છે. આગામી 13 ઓક્ટોબરે મતગણતરીના દિવસે આ કંટ્રોલરૂમ ચાલુ રહેશે તેવું સૂત્રોએ જણાવ્યું છે. મહાનગરપાલિકની આ ચૂંટણી દરમિયાન કોઈ નાગરિકને સમસ્યા હોય અથવા તે કોઈ રજૂઆત તે માટે કંટ્રોલ રૂમ નંબર 07923259035 પર સંપર્ક કરવા માટે કહેવામાં આવ્યું છે.
October 10, 2026
1min23
શારદીય નવરાત્રી 11 ઓક્ટોબરથી શરૂ થાય છે. નવરાત્રી દરમિયાન માતાજીની પૂજા આરાધના અને વ્રત ઉપવાસ કરવાથી જીવનમાં સુખ, શાંતિ અને સમૃદ્ધિ આવે છે, સાથે સાથે નકારાત્મક ઉર્જા દૂર થાય છે.
નવરાત્રી હિન્દુ ધર્મનો સૌથી પવિત્ર તહેવાર છે. હિન્દુ પંચાંગના જણાવ્યા અનુસાર, આસો સુદ એકમ તિથિથી શારદીય નવરાત્રી શરૂ થાય છે. નવરાત્રીમાં માતા દુર્ગાના નવ સ્વરૂપોની પૂજા કરવામાં છે. એવું માનવામાં આવે છે કે નવરાત્રીમાં નવ દિવસ દરમિયાન મા દુર્ગાની પૂજા કરવાથી ઘરમાં સુખ અને સમૃદ્ધિ આવે છે અને જીવનની સમસ્યાઓ દૂર થાય છે.
નવરાત્રી દરમિયાન ભક્તો નવદુર્ગાના નવ સ્વરૂપો – મા શૈલપુત્રીથી લઈને મા સિદ્ધિદાત્રીની પૂજા કરે છે. દસમા દિવસે વિજયાદશમીની ઉજવણી કરવામાં આવે છે. આ વર્ષે નવરાત્રી 11 ઓક્ટોબરથી શરૂ થશે. સમાપન સમારોહ 20 ઓક્ટોબર, 2026 (મંગળવારે) વિજયાદશમી પર થશે. ચાલો જાણીએ નવરાત્રીના ઘાટ સ્થાપનની તિથિ અને શુભ મુહૂર્ત.
શારદીય નવરાત્રી 2026
પંચાગ મુજબ આસો સુદ તિથિ 10 ઓક્ટોબરે રાત્રે 9.18 વાગ્યાની આસપાસ શરૂ થશે અને 11 ઓક્ટોબરે રાત્રે 9.31 વાગ્યા સુધી રહેશે. ઉદય તિથિ અનુસાર, નવરાત્રીનો પ્રથમ દિવસ 11 ઓક્ટોબરે જ માન્ય રહેશે. આ દિવસે ઘાટ સ્થાપવાની વિધિ છે. નવરાત્રીના પ્રથમ દિવસે ઘરમાં કળશ સ્થાપિત કરીને દેવી ભગવતીની પૂજા શરૂ કરવામાં આવે છે. ભક્તો નવ દિવસ માતાજીના વિવિધ સ્વરૂપોની પૂજા કરે છે.
શારદીય નવરાત્રી ઘાટ સ્થાપના શુભ મુહૂર્ત
પંચાંગ અનુસાર, 11 ઓક્ટોબરના રોજ ઘટ સ્થાપનનો શુભ મુહૂર્ત સવારે 6:19 થી 10:12 વાગ્યા સુધી રહેશે. આ સિવાય તમે અભિજીત મુહૂર્તમાં સવારે 11:44 થી બપોરે 12:31 સુધી ઘટ સ્થાપના પણ કરી શકો છો. જો કે, વિવિધ શહેરોમાં સૂર્યોદય અને સ્થાનિક સમય વચ્ચેના તફાવતને કારણે, મુહૂર્તમાં થોડો ફેરફાર થઈ શકે છે.
શારદીય નવરાત્રી પૂજા વિધિ
નવરાત્રીના પહેલા દિવસે સવારે સ્નાન કરો, સ્વચ્છ કપડાં પહેરો અને પૂજા સ્થાન સાફ કરો. ત્યારબાદ બાજોઠ પર લાલ અથવા પીળું આસન પાથરીને મા દુર્ગાની મૂર્તિ અથવા ફોટાની સ્થાપના કરો. સૌ પ્રથમ, ભગવાન ગણેશનું ધ્યાન કરો અને પછી કળશ સ્થાપન કરો.
ઘટ સ્થાપન માટે માટી કે તાંબાનું કળશ લો. કળશની ફરતે લાલા નાનાછડી બાંધો. કળશમાં ગંગાજળ કે સ્વચ્છ પાણી ભરો અને તેમાં અક્ષત, સોપારી, સિક્કો, કુમકુમ, પુષ્પ અને દુર્વો નાખો. પછી કળશ પર આંબો અથવા આસોપાલવના 5 થી 7 પાન મૂકો. પછી લાલ કાપડ કે ચુંદડીમાં પલેટી શ્રીફળ મૂકો. હવે આ કળશને માતાજીની જમણી બાજુ સ્થાપિત કરો. ત્યારબાદ માતા દુર્ગાનું આહ્વાન કરો. કળશ પર કુમકુમથી ચાંલ્લો કરો, અક્ષત, સિંદૂર, ફુલ, માળા અર્પણ કરો. ઘટ સ્થાપન બાદ દિપક પ્રગટાવી માતાજીની આતરી કરો. પછી પ્રસાદમાં મીઠાઇ ફળ અને પાનનું બીડું અર્પણ કરો.
નવરાત્રીમાં પૂજા કર્યા બાદ દુર્ગા સપ્તશતી અથવા દેવીના મંત્રોનો પાઠ કરો. દરરોજ મા દુર્ગાની આરતી કરો અને તમારી શ્રદ્ધા અનુસાર વ્રત રાખો. નવરાત્રીના નવ દિવસ સાત્વિક ખોરાક ખાઓ અને માતાના નવ સ્વરૂપોની પૂજા કરો. એવું માનવામાં આવે છે કે નવરાત્રીની આઠમ કે નોમ તિથિ પર કન્યા પૂજન અને હવન કરવાથી નવરાત્રીની પૂજા પૂર્ણ માનવામાં આવે છે.
September 17, 2026
1min60
સુરત સાયબર ક્રાઈમ ડિપાર્ટમેન્ટે રાજ્યસભાના સાંસદ ગોવિંદ ધોળકિયાના નામે ફ્રોડ કરનારાને પકડી પાડ્યા છે. કરોડો રૂપિયાની સાયબર છેતરપિંડીનો પર્દાફાશ કર્યો છે. રાજ્યસભાના સાંસદ ગોવિંદ ધોળકિયાએ સાયબર ક્રાઈમ કેસની કાયદેસર ફરિયાદ કર્યા બાદ પોલીસે એક્શન લીધું છે. હરિયાણામાંથી પરવેઝ અને ઈર્શાદ નામના બે આરોપીની ધરપકડ કરી છે. સુરત પોલીસે આ કેસ અંગે સ્પષ્ટતા કરતા કહ્યું હતું કે, ગોવિંદ ધોળકિયાના અસલ વીડિયો સાથે ચેડા કરીને AI થી વોઈસ ઉમેરી દીધો હતો. પછી એને ખોટો ઉપયોગ કર્યો હતો.
પછી આ ફેક વીડિયો ફેસબુક, ઈન્સ્ટાગ્રામ સહિતના સોશિયલ મીડિયા પર પોસ્ટ કરી દેવાયો હતો. અલગ અલગ પેજ પરથી આ વીડિયો પોસ્ટ થયો હતો. વીડિયોમાં જૂના ચલણી સિક્કાના બદલે લાખોની કેશ આપવામાં આવશે એવી વાત થઈ રહી છે. આ લાલચ હતી પછી લોકોને સંપર્ક કરવા માટે આરોપીઓએ આ વીડિયો સાથે પોતાનો એક નંબર પણ જાહેર કરી દીધો હતો. આ પછી આ નંબરના આધારે આરોપી જે તે લોકોનો સંપર્ક કરીને પૈસા ખંખેરતા હતા.
સાયબર ક્રાઈમ પોલીસની તપાસમાંથી એ વાત સામે આવી છે કે, આરોપીઓએ 9.84 લાખની છતરપિંડી કરી હતી, પોલીસે સાયબર સિક્યોરિટી અને હ્યુમન ઈન્ટેલિજન્સની મદદથી આરોપીને પકડવા માટે ચક્રો ગતિમાન કર્યા હતા. સુરત સાયબર ક્રાઈમ પોલીસે બન્ને આરોપીઓની ધરપકડ કરીને વધુ તપાસ શરૂ કરી છે. આ ફ્રોડ કેવી રીતે આચર્યું અને પૈસાનું શું કર્યું એ અંગે પોલીસ પૂછપરછ કરી રહી છે.
અત્યાર સુધીમાં કેટલા લોકોને આ રીતે ટાર્ગેટ કરાયા અને કેવી રીતે પૈસા ખંખેરવામાં આવ્યા આ અંગે પણ ખુલાસા થઈ શકે છે. પોલીસે બન્ને આરોપીઓની ધરપકડ કરીને કાયદેસરની કાર્યવાહી શરૂ કરી દીધી છે. પોલીસ તપાસમાંથી સામે આવ્યું છે કે, ChatGPT જેવા AI ટુલ્સની મદદથી ડીપફેક વીડિયો તૈયાર કરવામાં આવ્યો હતો. આરોપીઓએ ‘ઓલ્ડ કોઈન કંપની’ના નામે ફેક પ્રોફાઇલ બનાવી હતી. એ પછી આ વીડિયો પોસ્ટ કર્યા હતા. આરોપીઓએ 11 UPI આઈડી અને 2 બેંક ખાતાં મારફતે દેશભરના લોકો પાસેથી નાણાં વસૂલ્યા હતા. નકલી આઈડીકાર્ડ પણ બનાવ્યા હતા. આ સાથે આધાર કાર્ડ અને પાનકાર્ડનો પણ ઉપયોગ કર્યો હતો.
September 9, 2026
1min89
ગુજરાતમાં શ્રમિકોની સુરક્ષા, આરોગ્ય અને કામકાજની સ્થિતિને વધુ સુદ્રઢ બનાવવાના ઉદ્દેશથી શ્રમ આયુક્તની કચેરી દ્વારા એક મહત્વપૂર્ણ નિર્ણય કરવામાં આવ્યો છે. કેન્દ્ર સરકારના ‘ધી ઓક્યુપેશનલ સેફ્ટી, હેલ્થ એન્ડ વર્કિંગ કંડિશન કોડ, 2020’ (OSH&WC Code) અને ગુજરાત સરકાર દ્વારા લાગુ કરાયેલા નિયમો અંતર્ગત હવે 10 કે તેથી વધુ શ્રમયોગીઓ ધરાવતા તમામ કારખાના, બાંધકામ સ્થળો, ઔદ્યોગિક તેમજ વ્યાપારી સંસ્થાઓ માટે ઓનલાઈન નોંધણી કરાવવી ફરજિયાત રહેશે.
રાજ્યની તમામ પાત્રતા ધરાવતી સંસ્થાઓ સરળતાથી નોંધણી પ્રક્રિયા પૂર્ણ કરી શકે તે હેતુથી ગુજરાત સરકાર દ્વારા કાર્યરત કરવામાં આવેલા શ્રમ સેતુ પોર્ટલ https://shramsetu.gujarat.gov.in મારફતે અરજી કરવાની રહેશે. આ જોગવાઈ મુજબ, નવી સ્થપાતી સંસ્થાઓએ કોડ લાગુ થયાના 60 દિવસની અંદર ‘ફોર્મ-1 ‘ ઓનલાઈન ભરીને નોંધણી પ્રમાણપત્ર મેળવી લેવાનું રહેશે.
જ્યારે જૂના શ્રમ કાયદા હેઠળ પહેલેથી નોંધાયેલી હાલની ચાલુ સંસ્થાઓએ કોડ અમલમાં આવ્યાના 180 દિવસની અંદર ‘ફોર્મ-1 ‘ ઓનલાઈન ભરીને પોતાનું નોંધણી પ્રમાણપત્ર ફરજિયાતપણે અપડેટ કરાવવાનું રહેશે.
આ ઉપરાંત, તમામ માલિકોએ મેળવેલું નોંધણી પ્રમાણપત્ર સંસ્થાના મુખ્ય સ્થળે પ્રત્યક્ષ અથવા ડિજિટલ સ્વરૂપે સ્પષ્ટ દેખાય તે રીતે પ્રદર્શિત કરવું અનિવાર્ય રહેશે. સંબંધિત કાર્યક્ષેત્રની તમામ સંસ્થાઓ નિર્ધારિત સમયમર્યાદામાં આ પ્રક્રિયા પૂર્ણ કરે તે સુનિશ્ચિત કરવા શ્રમ આયુક્તની કચેરીની યાદીમાં જણાવાયું છે.
September 9, 2026
1min79
અમદાવાદ શહેરના સરદાર વલ્લભભાઈ પટેલ ઇન્ટરનેશનલ એરપોર્ટ પર 7/9/26 મોડી રાતથી વહેલી સવાર સુધી હાઈ વૉલ્ટેજ ડ્રામા સર્જાયો હતો, જેમાં વિદેશથી આવેલા પેસેન્જરને દાણચોરીની કથિત મદદગારી કરવા બદલ બે કસ્ટમના સુપરિટેન્ડન્ટ અને બે ઇન્સ્પેક્ટરને સસ્પેન્ડ કરી દેવામાં આવતા સમગ્ર કસ્ટમ વિભાગમાં ફફડાટ અને ચર્ચા જામી હતી.
અમદાવાદના એરપોર્ટ ઉપર છેલ્લા ત્રણ વર્ષથી ગાંજાની હેરાફેરી ફોરેન કરન્સી અને સોનાના દાગીનાની દાણચોરી વધી ગઈ હતી અને કસ્ટમ વિભાગે પેસેન્જરોને પકડી ગુના પણ દાખલ કરીને ધરપકડ કરી હોવાના કિસ્સા પણ નોંધાયા હાત. તેમ છતાં ઉચ્ચકક્ષાએ કસ્ટમના અધિકારીઓને શંકા હતી કે એરપોર્ટ ઉપર કેટલાક અધિકારીઓ કસ્ટમ વિભાગના નિયમોનું પાલન કરતા નથી. જેના આધારે કેટલાક પુરાવા કસ્ટમને મળ્યા હતા. ત્યારબાદ એરપોર્ટ કસ્ટમ્સના બે સુપરિટેન્ડન્ટ કુલદીપ પાલિવાલ અને વિનય અરોરા તેમજ બે કસ્ટમ ઇન્સ્પેક્ટર ભરત મલ મીના અને કૌશલ કિશોરને સસ્પેન્ડ કરી દેવામાં આવ્યા હોવાની માહિતી સૂત્રોએ આપી હતી.
એરપોર્ટ ઉપર જે હાઇવોલ્ટેજ ડ્રામા થયો તેના સીસીટીવી ફૂટેજ દ્વારા પણ આખી હકીકત જાણી શકાય છે. અમદાવાદ કસ્ટમના ટોચના સૂત્રોનો સંપર્ક કરવામાં આવતા તેમણે અધિકારીઓ સામે સસ્પેન્શનના પગલાં લીધા હોવાનું જણાવીને વધુ માહિતી આપવાનો ઇનકાર કર્યો હતો અને કસ્ટમના અધિકારીઓએ ફરજ દરમિયાન બોડીવોર્ન કેમેરા લગાવ્યા ન હતા તેવું કારણ બતાવ્યું હતું, પરંતુ બોડી વોર્ન કેમેરા નહીં લગાવવાથી અધિકારીઓને સસ્પેન્ડ કરી દેવામાં આવે તેવી વાત ગળે ઉતરે તેમ નથી. કસ્ટમના અધિકારીઓનું ચોક્કસપણે માનવું છે કે કેટલાક અધિકારીઓ દાણચોરી કરવામાં પેસેન્જરની મદદગારી કરી રહ્યા હતા.
હવે નજીકના દિવસોમાં વધુ કસ્ટમના અધિકારીઓ સામે કાર્યવાહી કરવામાં આવે તેમ પણ સૂત્રોએ જણાવ્યું હતું. અગાઉ પણ એક પેસેન્જર દાણચોરીનું સોનું લઈને બહાર નીકળી ગયો હતો અને એરપોર્ટ સર્કલ પાસે બે પોલીસ કોન્સ્ટેબલ દ્વારા તેનું અપહરણ કરીને લૂંટ ચલાવી હતી. આ પ્રકરણમાં પણ કસ્ટમના અધિકારીઓની મદદ વગર આ પ્રકારે ગોલ્ડ બહાર નીકળવું અશક્ય હોવાનું કસ્ટમ વિભાગ માની રહ્યું છે.
August 30, 2026
1min91
વડા પ્રધાન નરેન્દ્ર મોદી 8 સપ્ટેમ્બરના રોજ ગુજરાતની મુલાકાતે આવવાના છે, જેમાં વડોદરા અને નવસારીમાં કાર્યક્રમોનું આયોજન કરવામાં આવ્યું છે.મળતી માહિતી અનુસાર પીએમ મોદી 8 સપ્ટેમ્બરના રોજ બપોરે 12 વાગ્યે વડોદરા એરપોર્ટ પર પહોંચશે. ત્યાંથી તેઓ વડોદરા યુનિવર્સિટી ગ્રાઉન્ડ જશે, જ્યાં તેમના દ્વારા વિવિધ વિકાસ કાર્યોનું ઉદ્ઘાટન અને લોકાર્પણ થવાનું છે. તેઓ સ્થળ પર એક જાહેર સભાને પણ સંબોધિત કરશે.
વડોદરામાં પોતાના કાર્યક્રમો પૂર્ણ કર્યા પછી, પીએમ મોદી બપોરે 3 વાગ્યે હેલિકોપ્ટર દ્વારા નવસારી જવાના છે. નવસારીમાં, તેઓ જિલ્લા ભાજપની નવી ઓફિસ, નમો કમલમનું ઉદ્ઘાટન કરશે. તેઓ સાંજે 4 વાગ્યા પછી નવસારી હેલિપેડથી સુરત જવા રવાના થશે અને પછી સુરતથી મુંબઈ જવા રવાના થશે. જોકે તેમના કાર્યક્રમોની સત્તાવાર યાદી હવે જાહેર કરવામાં આવશે.
કેન્દ્રીય પ્રધાન અને નવસારી લોકસભા સાંસદ સીઆર પાટીલે શનિવારે પ્રધાનો, પક્ષ સંગઠનના પદાધિકારીઓ અને અધિકારીઓ સાથે પીએમ મોદીની મુલાકાતની તૈયારીઓ અને વ્યવસ્થાઓની સમીક્ષા કરવા માટે બેઠક યોજી હતી.
દરમિયાન, ગુજરાતના નાયબ મુખ્ય પ્રધાન હર્ષ સંઘવી પણ શનિવારે સાંજે વડા પ્રધાનની મુલાકાતની તૈયારીઓની સમીક્ષા કરવા માટે વડોદરા પહોંચ્યા હતા. સંઘવીએ કાર્યક્રમ સ્થળની મુલાકાત લીધી હતી અને સર્કિટ હાઉસ ખાતે વડોદરાના સાંસદ, શહેર ભાજપ પ્રમુખ, ધારાસભ્યો અને વરિષ્ઠ સરકારી અધિકારીઓ સાથે બેઠક યોજી હતી.
પીએમ મોદી 4 જુલાઈએ ગુજરાત આવ્યા હતા. જ્યારે તેમણે સાણંદમાં સીજી સેમી આઉટસોર્સ્ડ સેમિકન્ડક્ટર એસેમ્બલી અને ટેસ્ટ સુવિધાનું ઉદ્ઘાટન કર્યું હતું.
August 29, 2026
1min65
મુંબઈથી અમદાવાદ વચ્ચે બુલેટ ટ્રેન દોડાવવા માટે સ્પેશિયલ કોરિડોર તૈયાર કરવામાં આવી રહ્યો છે, ત્યારે તેના સમાંતર હાઈ અથવા સેમી હાઈ સ્પીડ ટ્રેન દોડાવવાની પણ રેલવેએ તૈયારીઓ હાથ ધરી દીધી છે, જે લાંબા અંતરની મુસાફરી કરતા પ્રવાસીઓ માટે સૌથી મોટા રાહતના સમાચાર છે.
પશ્ચિમ રેલવેએ મુંબઈથી ઉપડતી 23 આવતી જતી મેલ-એક્સપ્રેસ ટ્રેનોની મહત્તમ ઝડપ 110 કિમી પ્રતિ કલાકથી વધારીને 130 કિમી પ્રતિ કલાક કરવાની મંજૂરી આપી છે. આ નિર્ણય બાદ આ ટ્રેનોની મુસાફરી વધુ ઝડપી બનવાની છે અને કેટલાક રૂટ પર મુસાફરોનો 45થી 60 મિનિટ સુધીનો સમય બચી શકે છે.
પશ્ચિમ રેલવેના જનરલ મેનેજર રામાશ્રય પાંડેની મંજૂરી બાદ આ સ્પીડ અપગ્રેડ કરાઈ છે. આ નિર્ણયનો લાભ મુંબઈ સેન્ટ્રલ, દાદર અને બાંદ્રા ટર્મિનસથી દોડતી એલએચબી ટ્રેનોને મળશે. આ ટ્રેનોમાં 22 એલએચબી કોચ હશે અને તેમને 130 કિમી પ્રતિ કલાકની મહત્તમ મંજૂર ઝડપે દોડવાની પરવાનગી આપવામાં આવી છે.
આ યાદીમાં દાદર-એકતા નગર એક્સપ્રેસ, બાંદ્રા-ભાવનગર, બાંદ્રા-ભુજ, બાંદ્રા-ઓખા, દાદર-ભગત કી કોઠી, દાદર-શ્રીગંગાનગર, વેરાવળ-બાંદ્રા, ઈન્દોર-હિસાર અને ઓખા-જયપુર સહિતની ટ્રેનોનો સમાવેશ થાય છે. લાંબા અંતરના રૂટ પર મેલ-એક્સપ્રેસ ટ્રેનોની સ્પીડ વધારવાથી મુસાફરોને મુસાફરીના કુલ સમયમાં નોંધપાત્ર રાહત મળવાની અપેક્ષા છે, એમ અધિકારીએ જણાવ્યું હતું.
જોકે, આ ટ્રેનો સમગ્ર મુસાફરી દરમિયાન સતત 130 કિમી પ્રતિ કલાકની ઝડપે નહીં દોડે. ટ્રેકની સ્થિતિ, સિગ્નલિંગ, સ્ટેશન પરના સ્ટોપ, કાયમી અને અસ્થાયી સ્પીડ પ્રતિબંધો સહિતના ઓપરેશનલ કારણોસર ટ્રેનની વાસ્તવિક ઝડપ સમય અને પરિસ્થિતિ પ્રમાણે બદલાશે. તેથી 45થી 60 મિનિટનો સમય બચવાનો અંદાજ છે અને ચોક્કસ કેટલો સમય બચશે તે પશ્ચિમ રેલવે દ્વારા સુધારિત સમયપત્રક જાહેર થયા બાદ જ સ્પષ્ટ થશે.
આ ઉપરાંત અમદાવાદ-પટના એક્સપ્રેસ (19421/22)ને પણ 130 કિમી પ્રતિ કલાકની ઝડપે દોડવાની મંજૂરી આપવામાં આવી છે. આ ટ્રેનના કોચની સંખ્યા પણ 20થી વધારીને 22 કરવામાં આવી છે.
પશ્ચિમ રેલવેના આ નિર્ણયથી એલએચબી કોચની ઉપયોગિતા વધુ સારી રીતે થશે અને સુધારિત સમયપત્રક અમલમાં આવ્યા બાદ મુંબઈથી દોડતી અનેક ટ્રેનોની મુસાફરી અગાઉ કરતાં ઝડપી બનશે તેનાથી પ્રવાસીઓના સમયની પણ બચત થશે.
August 7, 2026
1min85
ગુજરાતના ફરવાલાયક સ્થળો પર દેશવિદેશથી પ્રવાસીઓ આવતા હોય છે, ત્યારે ગૂગલ મેપ અને નકલી વેબસાઇટ્સ મારફતે હોટેલ બુકિંગના નામે ઠગાઈ કરતી એક નવી સાઇબર ગેંગ સક્રિય થઈ હોવાનું પોલીસ તપાસમાં ખુલાસો થયો હતો. આ ગેંગ વિવિધ પ્રખ્યાત પર્યટક સ્થળો, હોટેલ્સ અને ટ્રસ્ટની અસલ વેબસાઇટ જેવી જ નકલી વેબસાઇટો બનાવીને સામાન્ય નાગરિકો સાથે આર્થિક છેતરપિંડી આચરતી હતી. ગુજરાત સાયબર સેન્ટર ઓફ એક્સેલન્સ, ગાંધીનગરના પોલીસ સબ-ઇન્સ્પેક્ટરે આ મામલે ફરિયાદ નોંધાવી કાર્યવાહી કરી હતી.
ફરિયાદમાં જણાવ્યા અનુસાર, 8 ઓક્ટોબર 2025થી 27 જુલાઈ 2026 સુધીના સમયગાળા દરમિયાન આ અજાણ્યા આરોપીઓએ કાવતરું ઘડીને આ છેતરપિંડી આચરી હતી. સાયબર હેલ્પલાઇન પર મળેલી વિવિધ અરજીઓનું ટેક્નિકલ વિશ્લેષણ કરતાં જાણવા મળ્યું હતું કે આરોપીઓએ સોમનાથના મહેશ્વરી અતિથિ ભવન સહિત 24 જેટલી ભળતા નામવાળી ફેક વેબસાઇટ્સ તૈયાર કરી હતી. આ વેબસાઇટ્સને ગૂગલ સર્ચ અને અન્ય ઓનલાઇન પ્લેટફોર્મ પર પ્રદર્શિત કરી, પોતે હોટેલના અધિકૃત પ્રતિનિધિ હોવાનો દાવો કરી લોકોનો વિશ્વાસ જીતતા હતા.
લોકો જ્યારે હોટેલ કે ધર્મશાળા બુકિંગ માટે આ નકલી વેબસાઇટ્સ કે તેમાં આપેલા સંપર્ક નંબરો પર કોલ કરતા, ત્યારે આરોપીઓ એડવાન્સ રકમ પેટે યુપીઆઈ કે અન્ય ડિજિટલ માધ્યમથી પૈસા ટ્રાન્સફર કરાવતા હતા. પૈસા મળ્યા બાદ આ ગેંગ બુકિંગ ન આપતી, ખોટી માહિતી આપતી કે ફરિયાદી સાથે સંપર્ક તોડી નાખતી હતી. આ રીતે દેશના અલગ-અલગ રાજ્યોના નાગરિકો સાથે નાની-નાની રકમની ઠગાઈ કરવામાં આવી હોવાનું જાણવા મળ્યું હતું. આ મામલે સાયબર ક્રાઈમ પોલીસ સ્ટેશન, ગાંધીનગર ખાતે ભારતીય ન્યાય સંહિતા તેમજ આઈટી એક્ટ હેઠળ અજાણ્યા ઇસમો વિરુદ્ધ ગુનો નોંધવામાં આવ્યો હતો.