વરાછા કો-ઓપ. બેંકને ટોટલ બિઝનેસ ગ્રોથ એન્ડ એક્સપાન્શન, પ્રોફિટેબિલિટી મેનેજમેન્ટ તથા પબ્લિક રિલેશન એન્ડ સોશિયલ એક્ટિવિટી કેટેગરીમાં શ્રેષ્ઠ બેંકનો ખિતાબ

ગુજરાતની અગ્રગણ્ય મલ્ટી સ્ટેટ શિડ્યૂલ્ડ સહકારી બેંક, ધી વરાછા કો-ઓપ. બેંક લિ., સુરતને વર્ષ 2025-26ની કામગીરી બદલ દક્ષિણ ગુજરાતની અર્બન કો-ઓપ. બેંકોની વેરી લાર્જ કેટેગરીમાં ત્રણ પ્રતિષ્ઠિત સ્કોબા પ્રાઈડ એવોર્ડ એનાયત કરવામાં આવ્યા છે. દક્ષિણ ગુજરાત અર્બન કો-ઓપ. બેંક એસોસિએશન લિ. (સ્કોબા) દ્વારા તા. 06 ઓક્ટોબર, 2026ના રોજ હિમાચલ પ્રદેશના મનાલી ખાતે આયોજિત સ્કોબા પ્રાઈડ એવોર્ડ સમારોહમાં વરાછા કો-ઓપ. બેંકને ટોટલ બિઝનેસ ગ્રોથ એન્ડ એક્સપાન્શન, પ્રોફિટેબિલિટી મેનેજમેન્ટ તથા પબ્લિક રિલેશન એન્ડ સોશિયલ એક્ટિવિટી એમ કુલ ત્રણ કેટેગરીમાં શ્રેષ્ઠ બેંક તરીકે સન્માનિત કરવામાં આવી હતી.

સમારોહમાં મુખ્ય મહેમાન તરીકે બે વખત માઉન્ટ એવરેસ્ટ સર કરનાર ઇન્સ્પેક્ટર જનરલ (IG) શ્રી પ્રેમસિંઘજી, તેમજ શ્રી જે. વી. શાહ અને શ્રી જી. પી. મિસ્ત્રી ઉપસ્થિત રહ્યા હતા. દક્ષિણ ગુજરાતની વિવિધ અર્બન કો-ઓપ. બેંકોની વર્ષ 2025-26ની કામગીરીને આધારે વિવિધ કેટેગરીમાં આ એવોર્ડ એનાયત કરવામાં આવ્યા હતા.

મલ્ટી સ્ટેટ શિડ્યૂલ્ડ બેંકના દરજ્જા સાથે કાર્યરત વરાછા કો-ઓપ. બેંકે 31 વર્ષના સફળ સફરમાં 30 શાખાઓના નેટવર્ક સાથે રૂ|. 7,400 કરોડથી વધુનો કુલ બિઝનેસ હાંસલ કર્યો છે. સહકારી બેંકિંગ ક્ષેત્રમાં સતત વિકાસ, મજબૂત નાણાકીય કામગીરી અને ગ્રાહકલક્ષી બેંકિંગ સેવાઓ માટે મળેલા આ ત્રણેય એવોર્ડ વરાછા બેંક માટે ગૌરવપૂર્ણ સિદ્ધિ છે.
સમારોહમાં દક્ષિણ ગુજરાતના 200થી વધુ સહકારી ક્ષેત્રના અગ્રણીઓ ઉપસ્થિત રહ્યા હતા.

ધી વરાછા કો-ઓપ. બેંકના ચેરમેનશ્રી નરેન્દ્રભાઈ કુકડીયા તથા વાઈસ ચેરમેનશ્રી રાજેન્દ્રભાઈ બાંભરોલીયા આ સમારોહમાં ઉપસ્થિત રહી મુખ્ય મહેમાન IG શ્રી પ્રેમસિંઘજીના વરદહસ્તે ત્રણેય એવોર્ડ સ્વીકાર્યા હતા.

આ પ્રસંગે સ્કોબાના પ્રેસિડેન્ટશ્રી ગૌતમભાઈ વ્યાસે દક્ષિણ ગુજરાતની સહકારી બેંકો દ્વારા કરવામાં આવી રહેલી પ્રગતિને બિરદાવી હતી. સ્કોબાના હોદ્દેદારશ્રીઓએ વરાછા બેંકને આ ગૌરવપૂર્ણ સિદ્ધિ બદલ અભિનંદન પાઠવ્યા હતા.

વરાછા બેંક – આપણી બેંકના સૂત્ર સાથે સતત પ્રગતિના પંથે આગળ વધી રહેલી વરાછા કો-ઓપ. બેંક માત્ર બેંકિંગ ક્ષેત્રમાં જ નહીં, પરંતુ સામાજિક ઉત્તરદાયિત્વ નિભાવવામાં પણ અગ્રેસર રહી છે. બેંક દ્વારા સાયબર ક્રાઇમ અવેરનેસ, નાણાકીય જાગૃતિ, બચત જાગૃતિ સહિતના વિવિધ લોકજાગૃતિના કાર્યક્રમોનું આયોજન કરવામાં આવે છે.

આ પ્રસંગે બેંકના ચેરમેનશ્રી નરેન્દ્રભાઈ કુકડીયાએ ત્રણેય એવોર્ડ બેંકના ડિરેક્ટર્સશ્રીઓ, બોર્ડ ઓફ મેનેજમેન્ટના સભ્યશ્રીઓ તથા સમગ્ર સ્ટાફને સમર્પિત કરતાં જણાવ્યું હતું કે, “આ સન્માન કોઈ એક વ્યક્તિની સિદ્ધિ નથી, પરંતુ વરાછા બેંક પરિવારના દરેક સભ્યની મહેનત, નિષ્ઠા અને ગ્રાહકોના અતૂટ વિશ્વાસનું પરિણામ છે. બેંક હંમેશા ગ્રાહકોના હિતને કેન્દ્રમાં રાખીને વિશ્વસનીય, સરળ અને આધુનિક બેંકિંગ સેવાઓ પૂરી પાડવા માટે પ્રતિબદ્ધ છે.” તેમણે વધુમાં જણાવ્યું હતું કે, તહેવારોના આ સમયમાં ગ્રાહકોને સરળતાથી નાણાકીય સુવિધા મળી રહે તે માટે બેંક દ્વારા 8.00% વ્યાજદરની “ધન લક્ષ્મી બચત યોજના” તથા 8.25%થી શરૂ થતી “ફેસ્ટિવલ કાર લોન” જેવી આકર્ષક યોજનાઓ અમલમાં મૂકવામાં આવી છે. બેંકના વાઈસ ચેરમેનશ્રી રાજેન્દ્રભાઈ બાંભરોલીયાએ જણાવ્યું હતું કે, સભાસદો, ખાતેદારો અને ગ્રાહકોના સતત સાથ-સહકાર અને વિશ્વાસના પરિણામે વરાછા બેંકે રૂ|. 7,400 કરોડથી વધુનો બિઝનેસ હાંસલ કર્યો છે, જે સમગ્ર વરાછા બેંક પરિવાર માટે ગૌરવ અને આનંદની બાબત છે.

આ ગૌરવપૂર્ણ સિદ્ધિ બદલ ચેરમેનશ્રી નરેન્દ્રભાઈ કુકડીયાએ બેંકના વાઈસ ચેરમેનશ્રી તેમજ તમામ ડિરેક્ટર્સશ્રીઓ, બોર્ડ ઓફ મેનેજમેન્ટના સભ્યશ્રીઓ, કર્મચારીઓ તેમજ બેંકના તમામ સભાસદો, ખાતેદારો અને ગ્રાહકોને હૃદયપૂર્વક અભિનંદન પાઠવ્યા હતા.

આજે બુધવાર, તા.2 સપ્ટેમ્બર 2026ના રોજ, FOSTA બોર્ડરૂમ ખાતે શહેરની વિવિધ ટેક્સટાઇલ માર્કેટના કાપડ વેપારીઓની મિટીંગ મળી હતી. આ મિટીંગની મુખ્ય કાર્યસૂચિ પ્રોસેસર્સ એસોસિએશન દ્વારા પ્રસ્તાવિત દર વધારા પર ચર્ચા વિચારણા કરીને વ્યાપારીક હિત જળવાય તેવી કાર્યવાહી કરવા અંગે નિર્ણય લેવાનો હતો.

મીટિંગ દરમિયાન, વેપારીઓએ પોતાના મંતવ્યો વ્યક્ત કરતા જણાવ્યું હતું કે પ્રોસેસર્સ એસોસિએશન દ્વારા લેવાયેલો નિર્ણય વ્યાજબી નથી. વેપારીઓનો આગ્રહ હતો કે આ પ્રકારનો નીતિ વિષયક નિર્ણય લેતા પહેલા, પ્રોસેસર્સ એસોસિએશને FOSTA અને વેપારીઓ સાથે પરામર્શ કરવો જોઇતો હતો. ટેક્સટાઇલ વેપારીઓ પણ ઇન્ડસ્ટ્રીઝના એક મહત્વના સ્ટેક હોલ્ડર છે અને તેમની પરિસ્થિતિઓને સમજી યોગ્ય નિષ્કર્ષ પર પહોંચી શકાયું હોત. પણ કમનસીબે વેપારીઓને વિશ્વાસમાં લીધા વગર નિર્ણય લેવાયો છે જે દુખદ છે.

ટેક્સટાઇલ વેપારીઓએ વધુમાં ટિપ્પણી કરી હતી કે યોગ્ય પરામર્શ અને સર્વસંમતિ વિના દર વધારો એક સરમુખત્યારશાહી વલણ દર્શાવે છે, જે વ્યવસાયિક હિત માટે હાનિકારક છે.

મીટિંગમાં હાજર વેપારીઓએ FOSTAને આ બાબતે પ્રોસેસર્સ એસોસિએશન સાથે વાતચીત કરવા વિનંતી કરી. તેમણે વિનંતી કરી હતી કે 7 સપ્ટેમ્બરના રોજ નિર્ધારિત પ્રસ્તાવિત દર વધારાને હાલ પૂરતો મુલતવી રાખવામાં આવે, જેથી સર્વસંમતિના આધારે નિર્ણય લેવા માટે તમામ હિસ્સેદારો વચ્ચે યોગ્ય ચર્ચા થઈ શકે.

FOSTA એ પ્રોસેસર્સ એસોસિએશનને પણ પત્ર લખ્યો હતો, જેમાં ભાર મૂક્યો હતો કે આવા નિર્ણયો બંને ક્ષેત્રો વચ્ચે સતત પરસ્પર સંકલન સુનિશ્ચિત કરવા માટે સંગઠન સાથે પરામર્શ કરીને લેવા જોઈએ.

શ્રી સૌરાષ્ટ્ર પટેલ સેવા સમાજ સુરત તરફથી યોજાયેલ ૧૭૨માં વિચારોના વાવેતર કાર્યક્રમમાં કાનજીભાઈ ભાલાળાએ જણાવ્યું હતું કે, ભારત પાસે અઢળક કુદરતી સંશાધનો છે. અને વિશાળ જન સમૂહ છે. જો માનવબળ વધુ પ્રગતિશીલ બને તો ભારત વિકસિત રાષ્ટ્ર ઝડપથી બની શકે છે. તા. ૧૩/૦૮/૨૦૨૬ ગુરૂવારે જમનાબા ભવન ખાતે યોજાયેલ ૧૭૨ માં થર્સ-ડે થોર્ટ કાર્યક્રમમાં વિકસિત ભારત ૨૦૪૭ ના રોડમેપ, સાધનો અને પડકારો વિશે વાત કરતા કાનજીભાઈ એ જણાવ્યું કે, આવક, સંપત્તિ, સુવિધાઓ ઉપરાંત લોકોનું આરોગ્ય અને ગુણવત્તાયુક્ત જીવન વિકસિત રાષ્ટ્રની ઓળખ છે. અર્થાત વિકાસ માત્ર અર્થતંત્રનો નહિ પરંતુ માનવજીવનની ગુણવત્તાનો પણ થવો જોઈએ.

સામાન્ય રીતે રાષ્ટ્રને ત્રણ ભાગ પાડવામાં આવે છે. પછાત, વિકાસશીલ અને વિકસિત રાષ્ટ્ર. અમેરિકા, જર્મન, જાપાન, સિંગણપોર, દક્ષીણ કોરિયા અને સ્વીત્ઝરલૅન્ડ જેવા દેશો વિકસિત રાષ્ટ્રની વ્યાખ્યામાં આવે છે. તો સામાન્ય માણસના મનમાં પ્રશ્ન થાય છે કે વિકસિત રાષ્ટ્ર કોને કહેવાય? વિકસિત રાષ્ટ્રની કોઈ ચોક્કસ વ્યાખ્યા નથી. પરંતુ વર્લ્ડ બેંક રાષ્ટ્રોની કેટેગરી નક્કી કરવામાં માપદંડ નક્કી કર્યા છે. તેમાં જે રાષ્ટ્રની વાર્ષિક માથાદીઠ આવક ૧૪૩૭૫ ડોલર એટલે કે રૂપિયા ૧૪ લાખ વાર્ષિક આવક હોય એ વિકસિત રાષ્ટ્ર ગણવા માટે એક માપ છે. અંતરીક્ષ ટેકનોલોજીમાં ભારત અગ્રેસર છે. પરંતુ ભારતની માથાદીઠ આવક હજુ ૨૬૫૦ ડોલર એટલે કે વાર્ષિક રૂ. ૧૯૩૪૮૦/- છે.

વિકસિત રાષ્ટ્રના લક્ષણો જોઈએ તો ઉંચી માથાદીઠ આવક, ઉચ્ચ માનવ વિકાસ, ઉત્તમ શિક્ષણ – આરોગ્ય, વધુ ઉત્પાદન અને રોજગાર, ટેકનોલોજીનો ઉપયોગ, ઈન્ફ્રાસ્ટ્રક્ચર અને જીવનની સારી ગુણવત્તા છે. ભારત દેશ પાસે વિકસિત રાષ્ટ્ર બનવાના ઘણા સંજોગો છે. ઝડપી વિકસિત મોટી અર્થવ્યવસ્થા છે. વિશાળ માનવબળ, ભારત યુવાનોનો દેશ છે. જે રાષ્ટ્રની મોટી તાકાત બની શકે છે. ડીઝીટલ ટેકનોલોજીમાં ભારત અગ્રેસર છે. પરંતુ ૨૦૪૭ સુધીમાં વિકસિત ભારત સામે ઘણા મોટા પડકારો પણ છે. માથાદીઠ ઓછી આવક અને આર્થિક અસમાનતા, બેરોજગારી, ભ્રષ્ટાચાર, માનવવિકાસ આંકમાં ભારત ઘણું પાછળ છે. શિક્ષણ અને આરોગ્યમાં ઘણા પ્રશ્નો છે. સુસારૂ શાસન અને જાગૃત નાગરિક પણ વિકાસ માટે મોટા પરિબળો છે.

વિકસિત ભારતના સ્વપ્નને કેન્દ્રમાં રાખી નવો વિચાર આપતા જણાવ્યું હતું કે, પ્રગતિશીલ અને જાગૃત નાગરિક એ રાષ્ટ્રની ખરી મૂડી છે. વધુ સારી માથાદીઠ આવક એ વિકસિત રાષ્ટ્રનું પ્રથમ લક્ષણ છે. જયારે આવક-આરોગ્ય સેવા અને માનવવિકાસ એ વિકસિત રાષ્ટ્ર બનવા માટે શરતો છે. જયારે વર્તમાન સમયે બેરોજગારી, આર્થિક અસમાનતા અને ભ્રષ્ટાચાર એ વિકસિત ભારત સામેના મોટા પડકારો છે.

નાગરિક એ રાષ્ટ્રની તાકાત છે. ત્યારે સારા નાગરિક બનવા પંચામૃત :
૧. જાગૃત અને જવાબદાર નાગરિક બનો.
૨. પ્રગતિશીલ રહો.
૩. રાષ્ટ્રહિત હંમેશા રાખો.
૪. તંદુરસ્ત રહો.
૫. સારા માણસ બનો.

વિકસિત ભારત માટે વિકસિત માનસિકતા જરૂરી છે. – સંજયસિંહ ગુર્જર

સુરત રીજીયનના પ્રોવિડંડફંડ કમિશ્નર સંજયસિંહ ગુર્જરે વિકસિત ભારત માટે જાગૃત નાગરિક આધાર વિષય ઉપર બોલતા જણાવ્યું હતું કે, વિકસિત ભારત એટલે માત્ર વ્યક્તિગત વિકાસ નહી પરંતુ સમગ્ર રાષ્ટ્રનો વિકાસ માત્ર રોડ રસ્તા, બિલ્ડીંગ કે ભૌતિક સુવિધાઓ નહી,પરંતુ માનવીય વિકાસ અને જીવનની ગુણવત્તા પણ જરૂરી છે. વિકસિત ભારત માટે સૌ પ્રથમ દરેક નાગરિકની વિકસિત અને જવાબદાર માનસિકતાનો વિકાસ કરવો ખુબ જરૂરી છે. જાતિવાદ, અમીર-ગરીબ વચ્ચેનો ભેદભાવ દુર કરવો એ વિકસિત ભારતનું પ્રથમ પગથીયું છે. વિકસિત ભારત માટે “મારૂ પણું” છોડીને “આપણું” વિચારવું ખુબ જરૂરી છે. રાષ્ટ્રભક્તિ માટે નાગરિકે સીમા પર લડવા જવું જરૂરી નથી જ્યાં છીએ ત્યાં રહીને રાષ્ટ્ર માટે શ્રેષ્ઠ યોગદાન આપવું વધુ જરૂરી છે.

દરેક જાગૃત નાગરિકની પ્રાથમિક ફરજ છે કે તે પોતાના સંતાનોને સમાજ અને રાષ્ટ્ર પ્રત્યેયની જવાબદારી શીખવે છે. દરેક નાગરિક પોતાના હકોની સાથે જવાબદારીનું કર્તવ્ય સમજે તે પણ વિકસતા ભારત બનાવવા જરૂરી છે.

જાગૃત નાગરિકતા માટે કેળવણી સાથે સંસ્કાર ધડતર જરૂરી છે. – જૈનીલ દેસાઈ (IFS)

વર્ષ ૨૦૨૩ માં UPSC ની IFS પરીક્ષામાં સફળતા મેળવી હાલ ડાંગના જંગલ વિભાગના આસિસ્ટન્ટ કન્ઝરવેટર ઓફિસર જૈનીલ જગદીશભાઈ દેસાઈ વિચારોના વાવેતર કાર્યક્રમમાં ખાસ ઉપસ્થિત રહ્યા હતા. સૌરાષ્ટ્રના જીરા ગામના વતની અને અભ્યાસ સુરતમાં કરી તેઓ IFS થયા તથા વધુમાં UPSC પરીક્ષા ૨૦૨૪ પણ પાસ કરી છે. પ્રતિભાવ આપતા તેમણે જણાવ્યું હતું કે, માણસ માત્ર આર્થિક રીતે સદ્ધર કે શિક્ષિત બનવાથી જાગૃત નાગરિક બનતો નથી. જાગૃત નાગરિકતા માટે કેળવણી સાથે સંસ્કાર ધડતર ખુબ જરૂરી છે. સેન્સ ઓફ ઓનરશીપ એટલે કુદરતી કે રાષ્ટ્રની સંપત્તિને પોતાની સમજવી તે છે. વિચારોનું વાવેતર કાર્યક્રમ પણ જાગૃત નાગરિકતા વિકસાવવા માટેનું એક ઉત્તમ પરિબળ છે. જરૂરિયાતમંદ લોકોને તેને મૂળભૂત જરૂરિયાત પૂરી પાડવી તે પણ જાગૃત નાગરિકતાની એક મહત્વપૂર્ણ નિશાની છે.

આ પ્રસંગે જૈનીલ દેસાઈના પિતા જગદીશભાઈ, માતા દક્ષાબેન તથા દાતાટ્રસ્ટી હસમુખભાઈ સાવલિયા તથા કિરણબેન ઉપસ્થિત રહ્યા હતા. કામરેજ તાલુકામાં કોમ્યુનીટી હેલ્થ ઓફિસર ડો. વિવેક ભૂવાનું અભિવાદન કરવામાં આવ્યું હતું. આયુષ્માન કાર્ડ બાબતે તેમનું માર્ગદર્શન જમનાબા ભવન ખાતે લોકોને મળશે.

ગત ગુરૂવારના વિચાર ધર્મેશ ચોવટિયાએ રજુ કર્યો હતો. જયારે કાર્યક્રમનું સંકલન ડો. અજય દેસાઈ તથા અંકિત સુરાણીએ કર્યું હતું. ઉપસ્થિત સર્વોને સુરત મહાનગરપાલિકા યુવા મોરચા તરફથી ઉપસ્થિત દરેકને ત્રિરંગાનું વિતરણ કરવામાં આવ્યું હતું.