આંતરરાષ્ટ્રીય FOB ભાવ કરતાં સુરતમાં યાર્ન મોંઘું મળતું હોવાનો વિવર્સોનો આક્ષેપ; વધેલા ફ્રેઇટના બહાને સ્થાનિક ભાવ કૃત્રિમ રીતે ઊંચા રાખાતા હોવાની ફરિયાદ

સુરત: સચીન વિવર્સ વેલ્ફેર એસોસીએશન રીંગ, સુરત (SWWAR) દ્વારા મુઠ્ઠીભર સ્પીનર્સ દ્વારા યાર્નના ભાવમાં કાર્ટેલાઇઝેશન કરવામાં આવતું હોવાનો આક્ષેપ કરી સરકાર સમક્ષ તાત્કાલિક મધ્યસ્થીની માંગ કરવામાં આવી છે. એસોસીએશનના જણાવ્યા મુજબ સુરતના હજારો વિવર્સોને આંતરરાષ્ટ્રીય બજારના FOB ભાવની નજીક યાર્ન ઉપલબ્ધ થાય તે માટે કેન્દ્ર સરકાર દ્વારા યોગ્ય ઉકેલ લાવવો જરૂરી છે.

સુરતને ટેક્સટાઇલ સિટી અને MMF હબ તરીકે ઓળખાવવામાં આવે છે અને શહેરમાં દરરોજ આશરે 6 કરોડ મીટર ગ્રે કાપડનું ઉત્પાદન થાય છે. આ માટે દર મહિને આશરે 1.51 લાખ મેટ્રિક ટન પોલીસ્ટર યાર્નનો વપરાશ થાય છે, જેમાં આશરે 60 ટકા હિસ્સો DTYનો હોવાનું એસોસીએશનનું કહેવું છે.

એસોસીએશનના આક્ષેપ મુજબ જૂન 2026 બાદ પોલીસ્ટર યાર્નના ભાવમાં આશરે 35થી 40 ટકાનો વધારો થયો છે. સ્પીનર્સ દ્વારા આંતરરાષ્ટ્રીય સંજોગો અને ફીડસ્ટોકના ભાવને ભાવવધારા માટે જવાબદાર ગણાવવામાં આવે છે, પરંતુ વિવર્સોના જણાવ્યા મુજબ સ્થાનિક અને આંતરરાષ્ટ્રીય યાર્નના ભાવ વચ્ચે મોટો તફાવત જોવા મળી રહ્યો છે.

દાખલા તરીકે, સુરતમાં મોટા પ્રમાણમાં વપરાતા 50/36 બ્રાઇટ યાર્નનો સપ્ટેમ્બરનો આંતરરાષ્ટ્રીય FOB ભાવ આશરે રૂ.141 પ્રતિ કિલો હોવા સામે સ્થાનિક સ્પીનર્સ દ્વારા આશરે રૂ.152નો ભાવ આપવામાં આવી રહ્યો છે. આયાતમાં વધેલા ફ્રેઇટ, કસ્ટમ ડ્યુટી અને સ્થાનિક પરિવહન ખર્ચ ઉમેરાતા લેન્ડેડ કોસ્ટ આશરે રૂ.169 પ્રતિ કિલો થાય છે. એસોસીએશનના મતે વધેલો ફ્રેઇટ આયાતી સ્પર્ધાને મર્યાદિત કરી રહ્યો છે.

એસોસીએશને સ્થાનિક FDY યાર્નના ભાવની આંતરરાષ્ટ્રીય FOB ભાવ, લેન્ડેડ કોસ્ટ અને ઇનપુટ ખર્ચ સાથે તુલનાત્મક તપાસ કરવાની તથા વધેલા ફ્રેઇટનો લાભ લઈ ઉત્પાદકો અસંગત ઊંચા ભાવ જાળવી રહ્યા છે કે કેમ તેની તપાસ કરવાની સરકાર પાસે માંગ કરી છે.