રમત જગત Archives - Page 45 of 45 - Anant Post

બ્રાઝિલિયન ફૂટબોલ સ્ટાર રોનાલ્ડિનો એક જ સમયે બે સ્ત્રી સાથે લગ્ન કરી રહ્યો છે. એક અહેવાલ પ્રમાણે આવતા ઓગસ્ટમાં રોનાલ્ડિનો તેની ફિયાન્સે પ્રિસિલા કોએલ્હો અને બિટ્રીઝ સૌઝા સાથે એકસાથે પરણવાનો છે. ૩૮ વર્ષના ફૂટબોલરે ૨૦૧૬થી બિટ્રીઝ સાથે ડેટિંગ શરૂ કર્યું હતું અને મજાની વાત એ છે કે તે વખતે પ્રિસિલા સાથે તેના સંબંધો ચાલુ હતા. પ્રિસિલા સાથે તે છેલ્લાં સાત વર્ષથી લિવ ઈન રિલેશનશીપમાં રહે છે. પ્રિસિલા અને બિટ્રીઝ રોનાલ્ડિનો સાથે ડિસેમ્બર ૨૦૧૬થી રિયો ડી જાનેરોના તેના ઘરમાં રહે છે.

બ્રાઝિલિયન અખબાર ઓ ડિયામાં છપાયેલા અહેવાલ પ્રમાણે, રિયોમાં એક પ્રાઈવેટ સમારોહમાં તે બંને છોકરીઓ સાથે પરણવાનો છે. વર્લ્ડ ફૂટબોલ પ્લેયર ઓફ ધ યરનો ખિતાબ ધરાવનાર રોનાલ્ડિનોએ ગયા વર્ષે જાન્યુઆરીમાં બંનેને એકસાથે લગ્નની પ્રપોઝલ મૂકી હતી. બંનેને તેણે એંગેજમેન્ટ રિંગ પણ આપી છે. રિપોર્ટ પ્રમાણે, રોનાલ્ડિનો પ્રિસિલા અને બિટ્રીઝને એલાઉન્સરૂપે ૧૫૦૦ ડોલર પોકેટ મનીના પણ આપે છે. તાજેતરમાં તેણે બંનેને એક સરખું પરફ્યુમ પણ ગિફ્ટમાં આપ્યું હતું. બ્રાઝિલ અને દુનિયાના શ્રેષ્ઠ પ્લેયર તરીકે નામના મેળવનાર રોનાલ્ડિનો બે વાર ફિફાનો બેસ્ટ પ્લેયર જાહેર થયો છે. બ્રાઝિલ વતી તે ૯૭ મેચ રમ્યો છે અને તેણે ૩૩ આંતરરાષ્ટ્રીય ગોલ કર્યા છે. ૨૦૦૨નો વર્લ્ડ કપ જીતેલી બ્રાઝિલની ટીમમાં પણ તે સામેલ હતો.

ઈજા વધશે તો ભારતીય સુકાની કોહલી ઈંગ્લેન્ડ સામેની ટેસ્ટ શ્રેણી પણ ગુમાવી શકે છે

ભારતના ઈંગ્લેન્ડ પ્રવાસ પહેલા જ ટીમને મોટો ફટકો પડ્યો છે. જેમાં ટીમના સુકાની વિરાટ કોહલીને સ્લિપ ડિસ્કની તકલીફ થઈ અને તબીબે તેને કાઉન્ટી ક્રિકેટમાં ન રમવાની સલાહ આપી છે. જો કોહલીની આ તકલીફ વધશે તો તે ઈંગ્લેન્ડ સામેની ટેસ્ટ શ્રેણી પણ ગુમાવી શકે છે. જોકે બીસીસીઆઇના અધિકારીઓ આ વાતને સમર્થન આપી નથી રહ્યા. એ વાત પણ નિશ્ચિત છે કે વિરાટ કોહલી જે અગાઉના પ્લાન મુજબ ઇંગ્લિશ ક્રિકેટ કાઉન્ટીની કેટલીક મેચ રમવાનો હતો તે હવે રમવાનો નથી. આમ વિરાટ કોહલીની ફીટનેસ તેમજ સ્લીપ ડીસ્કના પ્રોબ્લેમ અંગે દેશભરમાં અને ક્રિકેટ વિશ્વમાં ખાસી ચર્ચા અને મતમતાંતર પ્રવર્તી રહ્યા છે.

કોહલીનું કાઉન્ટી ક્રિકેટમાં ન રમવું ઈંગ્રેન્ડના પ્રશંસકો માટે નિરાશાજનક સમાચાર છે. જોકે, ખુદ કોહલી માટે આ વાત ઘણી નિરાશાજનક છે કે તે કાઉન્ટી ક્રિકેટમાં નહીં રમી શકે. કોહલી સતત ક્રિકેટ રમે છે અને તેના કામના ભારણથી બીસીસીઆઈ પણ ચિંતિત છે. ભારત માટે આગામી 18 મહિના ઘણા મહત્વના છે જેમાં ઈંગ્લન્ડ પ્રવાસ ઉપરાંત વર્લ્ડ કપમાં પણ તેમને ભાગ લેવાનો છે.

વિરાટ કોહલીએ ઈંગ્લેન્ડ પ્રવાસ દરમિયાન ટેસ્ટ ક્રિકેટ શ્રેણીની પૂર્વ તૈયારીઓના ભાગ રૂપે કાઉન્ટી ક્રિકેટ રમવાનો નિર્ણય કર્યો હતો અને આ માટે તેણે સરે ટીમ સાથે કરાર પણ કર્યો હતો. જોકે, ભારતીય સુકાની છેલ્લા 12 મહિનાથી સતત ક્રિકેટ રમી રહ્યો છે જેના કારણે તેને સ્લિપ ડિસ્કની તકલીફ થઈ છે. મુંબઈના ખારમાં આવેલી હોસ્પિટલના જાણીતા ઓર્થોપેડિક સર્જને કોહલીની તકલીફનું નિદાન કર્યું છે.

કોહલી માટે આ સમસ્યા ત્યારે સામે આવી છે જ્યારે તેને કાઉન્ટી ક્રિકેટ રમવા જવાનું છે. કોહલી 2014ના ઈંગ્લેન્ડ પ્રવાસમાં નિષ્ફળ રહ્યો હોત જેના કારણે આ વખતે શ્રેષ્ઠ પ્રદર્શન કરવા ઈચ્છતા ભારતીય સુકાનીએ કાઉન્ટી ક્રિકેટ રમવાનો નિર્ણય કર્યો હતો. મુંબઈ મિરરમાં પ્રકાશિત અહેવાલ મુજબ કોહલી બુધવારે બપોરે ખાર હોસ્પિટલ ગયો હતો અને ઓર્થોપેડિક સર્જન અને તેમની ટીમે કોહલીની તપાસ કરી હતી. ડોક્ટરે કોહલીને તેની સ્પાઈન નર્વ્સમાં તકલીફ હોવાનું જણાવ્યું હતું. તેમણે તે પણ કહ્યું હતું કે જો આ મુશ્કેલી વધશે તો તે જૂલાઈમાં શરૂ થનારી ઈંગ્લેન્ડ શ્રેણીની શરૂઆતની મેચો ગુમાવી શકે છે. જોકે, ડોક્ટરે હાલની પરિસ્થિતિમાં કોહલીને કોઈ ઓપરેશનની જરૂર નથી તેમ પણ જણાવ્યું હતું.

ટ્વિટર પર વીડિયો પોસ્ટ કરી કહ્યું- હું હવે ઘણો થાકી ગયો છું

દક્ષિણ આફ્રિકાના ટોચના બેટ્સમેન એબી ડિ વિલિયર્સે ક્રિકેટના તમામ ફોર્મેટમાંથી એકાએક સંન્યાસ લઈ લીધો છે. બુધવારે ડિ વિલિયર્સે પોતાના ટ્વિટર એકાઉન્ટ પર એક વીડિયો શેર કરીને જણાવ્યું હતું કે, ‘આજે મે એક મોટો નિર્ણય કર્યો છે.’ આ સાથે જ તેમણે આંતરાષ્ટ્રીય ક્રિકેટમાંથી પોતાના સંન્યાસની જાહેરાત પણ કરી હતી.

ડિ વિલિયર્સે વધુમાં કહ્યું કે, ‘હાલમાં જ અમે ભારત અને ઓસ્ટ્રેલિયા વિરુદ્ધ સીરિઝ જીતી અને હવે એવો અહેસાસ થઈ રહ્યો છે કે ક્રિકેટ છોડવાનો આ યોગ્ય સમય છે.’ વિશ્વભરમાં 360 ડિગ્રી બેટિંગ કરવા માટે જાણીતા ડિવિલિયર્સે 30 માર્ચ 2018ના છેલ્લે ઈન્ટરનેશલ ક્રિકેટ મેચ રમી હતી. જ્હોનિસબર્ગમાં ઓસ્ટ્રેલિયા વિરુદ્ધ રમાયેલી મેચમાં તેણે (69+6) કુલ 75 રન ફટકાર્યા હતા.

પોતાના વીડિયોમાં ડિ વિલિયર્સે જણાવ્યું કે, ‘મારી ઈનિંગ્સ પૂરી થઈ, ઈમાનદારીથી કહું તો, હું ઘણો જ થાકી ગયો છું. આ મુશ્કેલ નિર્ણય હતો, મે આ અંગે લાંબા સમય સુધી વિચાર કર્યો અને હવે હું નિવૃતિ લેવા માંગુ છું, હજી ઘણું ઉમદા ક્રિકેટ રમી શકુ છું તેમ છતા હું રિટાયરમેન્ટ લઈ રહ્યો છું.’

પોતાના 14 વર્ષના ઈન્ટરનેશનલ કેરિયરમાં ડિવિલયર્સે 114 ટેસ્ટ મેચમાં 22 સદી સહિત 50.66ની એવરેજથી 8,765 રન ફટકાર્યા હતા. 220 વનડેમાં તેણે 53.5ની સરેરાશથી 9,577 રન કર્યા હતા. ઈન્ટરનેશનલ T20માં પણ તેનો પ્રભાવ યથાવત્ રહ્યો છે. 78 T20 મેચમાં 10 અડધી સદી સાથે કુલ 1,672 રન ડીવિલિયર્સે બનાવ્યા છે.

2019ના વર્લ્ડ કપ પૂર્વે ડિ વિલિયર્સે અચાનક સંન્યાસ લઈ લેતા સાઉથ આફ્રિકાના વર્લ્ડ કપ મિશનને મોટો ફટકો પડ્યો છે. આગામી વર્ષે ઈંગ્લેન્ડમાં રમાનારા વર્લ્ડ કપમાં તે દક્ષિણ આફ્રિકાની ટીમની મહત્વની રણનીતિનો હિસ્સો હોવાનું જણાઈ રહ્યું હતું.